Кундалик фарз намозларини ўқиш вақтида фарзнинг олдидан ёки ортидан, фарз намозлар билан биргаликда ўқиладиган намозларни “Равотиб суннат намозлари” дейилади. Равотиб суннат намозларининг вақти фарз намознинг вақти билан белгиланади. Бу намозларни фарз намозларига қўшиб ўқиш Пайғамбаримиз соллаллоҳу алайҳи васаллам амалга оширган иш (суннат) бўлгани учун халқ тилида бу намозлар "суннат намозлари" деб аталиб қолган.

Равотиб намозларнинг баъзиси таъкидланган суннат, баъзиси эса таъкидланмаган суннатдир. Таъкидланган суннат қуйидаги ҳадиси шарифда баён қилинади:
عَنْ عَائِشَةَ رَضِىَ اللَّهُ عَنْهَا قَالَتْ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «مَنْ ثَابَرَ عَلَى اثْنَتَيْ عَشْرَةَ رَكْعَةَ مِنَ السُّنَّةِ بَنى الله لَهُ بَيْتاً في الْجَنَّةِ أَرْبَعِ رَكَعَاتٍ قَبْلَ الظُّهْر، وَ رَكْعَتَيْنِ بَعْدَهَا ، وَرَكْعَتَيْنِ بَعْدَ المَغْرِبِ، وَرَكْعَتَيْنِ بَعْدَ الْعِشَاءِ، وَرَكْعَتَيْنِ قَبْلَ الْفَجْر». رَوَاهُ َالتِّرْمِذِيُّ
Оиша розияллоҳу анҳодан ривоят қилинади: Расулуллоҳ соллаллоҳу алайҳи васаллам: “Ким суннат бўлган ўн икки ракат намозни бардавом ўқиса, Аллоҳ унга жаннатда қаср бино қилади. У (ўн икки ракат) пешиндан олдин тўрт ва кейин икки ракат, шомдан кейин икки ракат, хуфтондан кейин икки ракат, бомдоддан олдин икки ракат”, – дедилар. (Имом Термизий ривоят қилган)
Ушбу таъкидланган суннатларни инсон ихтиёрий қасд билан тарк қилиш дуруст эмас. Ҳаттоки, мусофир сафарда тўрт ракатлик фарз намозларни қаср қилиб ўқиса ҳам, бу суннатларни тўлиқ ўқийди.

Равотиб суннат намозлари ичида бомдод намозининг суннати энг кўп таъкидлангандир. Шунинг учун унинг ўзига хос баъзи фаръий масалалари бор. Бу икки ракат намоз Бомдод намозининг икки ракат фарзидан олдин ўқилади. Унинг фазилати бир неча ҳадиси шарифларда келган. Қуйида мисол тариқасида бир ҳадис келтириб ўтилади:
عَنْ عَائِشَةَ رَضِىَ اللَّهُ عَنْهَا قَالَتْ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ « رَكْعَتَا الْفَجْرِ خَيْرٌ مِنْ الدُّنْيَا وَمَا فِيهَا ». رَوَاهُ مُسْلِمٌ وَالتِّرْمِذِيُّ وَأَحْمَدُ
Оиша розияллоҳу анҳодан ривоят қилинади: Расулуллоҳ соллаллоҳу алайҳи васаллам: “Бомдоднинг икки ракати дунё ва ундаги нарсалардан яхшидир”, – дедилар. (ҳадисни Имом Муслим, Термизий ва Аҳмад ривоят қилган)
Қиёмга қодир киши узрсиз суннат ва нафл намозларини ўтириб ўқиши жоиз бўлса-да, бомдод намозининг суннатини ўтириб ўқиши жоиз эмас.

Шунингдек бирор бир намоз ўз вақтида ўқилмаса, у намознинг фарзи қазо қилинган вақтда равотиб суннати ўқилмайди. Лекин бомдод намози ўз вақтида ўқилмаса ва пешин намозигача бомдод намозининг қазоси ўқилса, икки ракат суннатнинг қазоси ҳам ўқилади. Фақатгина бомдод намозининг суннатига хос бўлган масалалардан яна бири — жамоат билан бомдод намозининг фарзи ўқилётган бир вақтда мазкур бомдод намозининг суннатини ўқишга киришиш дуруст бўлаверади. Агар бомдод намозининг фарзидан бир ракатига (яъни иккинчи ракатига) ета олишга имкони бўлса, бундай одам суннатни ўқийди. Чунки, шу тариқа ҳам фарзнинг, ҳам суннатнинг фазли топилади. Шу ўринда мазкур суннатни масжиддан ташқарида (айвонда) ёки устун ва шунга ўхшаш сутранинг орқасида ўқиш лозим. Фарз адо қилиниб турган сафда суннат намоз ўқиш жоиз эмас. Аммо, бомдоднинг суннатини ўқиса жамоатга етиша олмайдиган бўлса, суннатни ўқимай жамоатга эргашиб фарзни адо қилади. Мазкур фарздан олдин ўқилмай қолган икки ракат суннат кейин фарзнинг орқасидан ўқилмайди. Чунки, фарздан кейин қуёш чиқиб бир миқдор кўтарилгунча намоз ўқиш макруҳдир. Шунингдек, имом Абу Ҳанифа раҳматуллоҳи алайҳи наздида мазкур суннатнинг қазоси ўқилмайди, фақатгина юқорида зикр қилинганидек, суннат фарзга тобеъ ҳолда, биргаликда қазо қилиб ўқилади.

Пешин намозининг фарзидан олдин тўрт ракат ва фарзидан сўнг икки ракат суннат намозлари ўқилади.
عَن علي رَضِىَ اللَّهُ عَنْه قال: «كان النبيُّ صَلَّى اللَّهُ عَلَيْهِ وَسَلَّمَ يُصَلِّي قَبْلَ الظُّهْرِ أرْبَعاً، وَبَعْدَهَا رَكْعَتَيْنِ». رَوَاهُ الترمذي.
Али розияллоҳу анҳудан ривоят қилинади: Набий соллаллоҳу алайҳи васаллам пешин намозидан олдин тўрт ракат, кейин икки ракат намоз ўқирдилар. (ҳадисни Имом Термизий ривоят қилган)
Бомдод намозинг икки ракат суннатидан сўнг пешин намозининг тўрт ракат суннати ҳам таъкидланади. Бу икки суннатдан бошқа суннат намозлар таъкидланишда баробар, бирини иккинчисидан устун кўриш йўқ.

Пешинда жамоат фарз намозини ўқиётган бўлса, пешиннинг суннатига киришиш дуруст эмас. Чунки, фарзни ўқиб бўлгандан кейин суннатни ўқишга имкон бор. Ҳаттоки, бир киши суннат намозини ўқиётганда фарзга иқомат айтилса, ўқиётган суннатни тарк қилиб жамоатга иқтидо қилади. Сўнгра, ўз ўрнида ўқилмаган бу тўрт ракат суннатни икки ракат суннатдан олдин ҳам, кейин ҳам ўқиш жоиз. Лекин муҳаққиқ уламолар олдин икки ракат суннатни ўқиб, сўнгра тўрт ракат суннатни ўқишга фатво берганлар. Жума намозининг фарзидан олдин ҳам, кейин ҳам тўрт ракат суннат бор.

Аср намозининг фарзидан олдин тўрт ракат намоз ўқиш мустаҳаб(қилиш яхши дейилган амал)дир. Унинг фазилати қуйидаги ҳадиси шарифда баён қилинади:
عَنْ ابْنِ عُمَرَ رَضِىَ اللَّهُ عَنْه أَنَّ النَّبِيَّ صَلَّى اللَّهُ عَلَيْهِ وَسَلَّمَ قَالَ: «رَحِمَ اللَّهُ امْرَأً صَلَّى قَبْلَ الْعَصْرِ أَرْبَعًا». رَوَاهُ أَحْمَدُ وَأَبُو دَاوُد وَالتِّرْمِذِيُّ .
Ибн Умар розияллоҳу анҳудан ривоят қилинади: Набий соллаллоҳу алайҳи васаллам: “Асрдан олдин тўрт ракат намоз ўқиган одамга Аллоҳ раҳм қилсин”, — дедилар. (ҳадисни Абу Довуд ва Термизий ривоят қилган)
Аср намози ўқилганидан сўнг шом намози ўқиб бўлингунча вақтда нафл намоз ўқиш макруҳ бўлади.