Мусулмон одам вафот этганида бошқа, уни билган, ўша ердаги мусулмонлар учун бу маййитни ювиш, кафанлаш, маййит учун жаноза намозини ўқиш ва ерга дафн қилиш фарзи кифоядир. "Фарзи кифоя" деб бажарилиши шарт (фарз) бўлган, баъзи мусулмонлар бажарса, бошқаларнинг ҳам зиммасидан соқит бўладиган, ҳеч ким бажармаса, барча бирдек гуноҳкор бўладиган амалга айтилади.

Мусулмон одам вафот этганидан кейин унга дуо ва шафоат мақсадида ўқиладиган намоз «жаноза намози» дейилади. Бизнинг Ҳанафий мазҳабимизда жаноза намози қиёмда туриш ва тўртта такбирдан иборат. Бошқа намозларни дуруст қилиш учун қўйиладиган шартлар жаноза намози учун ҳам амал қилади.

Ўлганлиги аниқ бўлган одамни ювиш, кафанлаш ва дафн қилишни тезлатиш лозим. Жаноза ҳақида одамларга эълон қилиш мустаҳаб бўлиб, жанозага қатнашувчи қанча кўпайса, марҳум учун шунча яхши бўлади. Дафн ишларини тезлаштириш марҳумга кўрсатилаётган ҳурмат ҳисобланади.

Жаноза намози учун қўйиладиган шартлар:
1. Намоз ўқиш учун қўйиладиган шартларнинг ҳаммаси жаноза намозида ҳам бўлиши керак. Жаноза намозининг вақти шарт қилинмайди. Маййит ювиб, кафанлангач ўқилаверади. Қуёш чиқаётган, ботаётган ва тиккага келган вақтда жаноза намозини ўқиб бўлмайди.
2. Вафот этган одам мусулмон бўлиши шарт қилинган. Кофирга жаноза ўқиб бўлмайди.
3. Маййит жаноза ўқувчи жамоатнинг олдида бўлиши шарт қилинган. Ғойиб маййитга жаноза ўқилмайди.
4. Маййитнинг жасадининг кўпчилик қисми боши билан бирга бўлиши керак. Жасаднинг фақатгина ярми (ёки ундан кам қисми) бўлса, ёки жасад бошсиз бўлса жаноза ўқилмайди.
5. Жаноза ўқилаётган пайтда майит ерда турган бўлиши керак. Одамларнинг қўлида турган, бирор ҳайвоннинг устида турган маййитга жаноза ўқилмайди.

Жаноза намозининг рукнлари:
1. Тўрт марта такбир айтиш;
2. Қиёмда туриш;
3. Бошқа намозлардаги каби салом бериш (вожиб).

Жаноза намозининг суннатлари:
1. Биринчи такбирдан кейин «сано» дуосини ўқиш;
2. Иккинчи такбирдан кейин «саловати иброҳимийя»ни ўқиш (вақт қисқа бўлганида, бошқа саловатларни ўқиш ҳам мумкин); 3. Учинчи такбирдан кейин марҳумнинг ҳаққига дуо қилиш ҳам суннатдир;
4. Тўртинчи такбирдан кейин дуо ўқилмасдан салом берилади.